HISTORIA DI ALCOLADO GLACIAL

E HISTORIA DI GLACIAL

Alcolado Glacial ta un marka Kurasoleño masha konosí bou di e poblashon di Kòrsou. E ta un produkto hopi kerí i e ta wòrdu usá na hopi lugá riba e isla ya pa hopi generashon. Aunke e produkto a bin ta kumpli ku diferente uso den transkurso di aña, e ta sigui ta un produkto ku bo mester tin den kas. No ta bèrdat?

Pero, kiko ta e historia di Alcolado Glacial? Kon bin a krea e produkto aki? Anto kiko a sòru pa e produkto aki bira un di e produktonan mas importante i eksitoso di Kòrsou? Lesa e artíkulo aki i laga nos bai bèk den tempu pa selebrá huntu e historia di Alcolado Glacial.

Alcolado Glacial a nase

Den dékada di añanan ‘40, un botikario na Kòrsou tabata buska un alternativa pa un ‘after-shave lotion’. E botikario aki, di ken nos no tin masha detaye, a eksperimentá ku vários produkto i diferente ingrediente, te na momento ku el a yega na e reseta di Alcolado Glacial. E botikario a ripará ku e no a yega na e after-shave lotion ku inisialmente e kier a yega na dje, pero ku e produkto ku el a krea, si tabata tin kualidatnan hopi refreskante. Despues di esaki, el a aserká Curaçao Laboratories anto bende nan e reseta.

E nòmber Alcolado Glacial a wòrdu skohe dor ku Alcolado ta nifiká friu anto Glacial ta un masa di eis. Pues ku e nòmber Alcolado Glacial ke representá un friu fuerte… anto kua mihó kompañero pa esaki ku un pingwin? E detaye interesante tokante esaki ta ku, ni maske e pingwin ta hopi konosí anto ta un di e pilánan di e marka Alcolado Glacial, en realidat nunka no a skohe un nòmber p’é. Si Curaçao Laboratories lo puntra bo pa duna e pingwin un nòmber, kua nòmber abo lo skohe?

Alcolado Glacial den komunidat kurasoleño

Ta for di 1948 spesífikamente, Curaçao Laboratories a kuminsá produsí i bende Alcolado Glacial den kantidatnan grandi. Na momento ku a kuminsá e produkshon, no tabata tin un idea di e importansia ku e produkto aki lo bai tin den pueblo kurasoleño. Loke si tabata bisto ta ku e produkto aki tabata destiná pa aliviá i kombatí e kalor ku nos sa eksperensiá riba nos isla. Poko poko e produkto a wòrdu adoptá pa grandi i chikí i el a bira un produkto ku simplemente no por a falta na kas. Dor ku mayoria di poblashon no tabata tin èrko na kas, a bira un kustumber pa basha un tiki Alcolado Glacial den awa ora di baña i asina sinti fresku pa mas largu. Ta asina ku e Alcolado Glacial a bira konosí komo e ‘èrko den bòter’.

Ademas di refreská, usuarionan regular di Alcolado Glacial a kuminsá us’é pa doló di kabes, nanishi será, tosamentu, doló di múskulo, aliviá piká di sangura, entre otro. Ta asina Alcolado Glacial a kuminsá bira parti di nos bida diario. Otro suseso ku a kontribuí na e kresementu di Alcolado Glacial tabata e tremendo propagandanan i promoshonnan ku Glacial a bin ta desaroyá den transkurso di aña. Awendia bo ta mira Glacial ta refreská hende riba kaya, den promoshon na diferente supermarket, hasiendo rifa tremendo riba medionan sosial, i hopi mas. Pero ken di nos (mayornan) ta kòrda temporada ku Mener Angel Job tabata usa su Alcolado Glacial den su programa “Show di Job” na kanal 8? E programa aki sigur a duna un impulso na Alcolado Glacial i ta forma parti di e kresementu di e marka.

Alcolado Glacial den eksterior

Ta ku hopi orguyo por bisa ku despues di hopi aña di esfuerso i apoyo di nos poblashon lokal, Alcolado Glacial ta konta ku rekonosementu mundial ya ku e ta wòrdu eksportá na mas ku 33 pais rònt mundu.

Plannan pa den futuro

E plannan di Alcolado Glacial ta pa sigui refreská i laga bo sinti mihó den momentonan malu. E intenshon pa ku futuro ta pa sigui desaroyá produktonan di kalidat altu, ku por kompañá bo den bo bida diario, i ta p’esei tin e Desinfektante di Man anto e Rub di Glacial. Otro produkto ku Glacial tin pensá di trese riba merkado lo ta produktonan similar, di kuido personal i mas ku klaro, refreskante. Kua otro produkto abo lo ke Glacial bin kuné?

Wak mas!