E IMPORTANSIA DI GLACIAL FOR DI 1948

UN PRODUKTO DI KÒRSOU

Ku mas ku 70 aña riba e merkado di Kòrsou, Glacial ta un di e markanan mas kerí na nos isla. Ademas di su produkto popular ‘Alcolado Glacial’, un loshon di mèntòl, su famia di produkto a krese den transkurso di tempu i a bin ta inkluí un bara di habon, un krema pa hunta, un desinfektante di man i awor un antiséptiko di promé ousilio ku alkohòl etíliko di 70% i un loshon desinfektante.  

Pero kiko ta e historia di Glacial? I ken ta tras di e éksito di e marka? Laga nos tira un bista den e historia di Glacial i e akontesimentunan mas resien rondó di e faborito lokal aki.

E HISTORIA DI GLACIAL I GLACIAL CARES

E loshon di spat di mèntòl tan popular di Glacial, ‘Alcolado Glacial’, a kuminsá wòrdu produsí na aña 1948. E kompania Curacao Laboratories, a establesé e Fábrika di Glacial na e mansion históriko Landhuis Chobolobo na Kòrsou. A traves di añanan, Glacial a ekstendé su vishon di “Kreá pa pone bo sinti bo mihó” na e komunidat lokal. Bou di su kampaña sosialmente responsabel Glacial Cares, e marka lokal ta hasi esfuerso pa krea un impakto positivo riba e salú i bienestar di e komunidat di Kòrsou. 

E PRODUKSHON DI GLACIAL

E produkshon di tur produkto di Glacial ta tuma lugá na Kòrsou. Na prinsipio, e proseso di produkshon tabata kompletamente na man. Pero awendia nos ta sigui un proseso semi-outomátiko. Nos personal ta konsistí di un tim altamente komprometí ku hopi aña di eksperensia serka Glacial.

E AKONTESIMENTUNAN RESIEN RONDÓ DI CORONA VÍRÙS

Mirando e akontesimentunan resien rondó di e Corona vírùs, nos personal ta trahando hopi duru pa kumpli ku e demanda altu pa nos produktonan riba merkado. Henter e tim di Glacial ta promové kontinuamente un bon higiene personal i lo sigui enkurashá e komunidat pa sigui e medidanan preventivo ofisial kontra di e Corona vírùs.

NOS PRODUKTONAN NOBO: LOSHON ANTISÉPTIKO I DESINFEKTANTE DI PROMÉ OUSILIO KU ALKOHÒL ETÍLIKO DI 70%

Den nos kompromiso ku e bienestar i salú di e komunidat, Glacial a lansa un antiséptiko di promé ousilio ku alkohòl etíliko di 70%, tambe konosí komo Alkohòl di Hunta. E produkshon di e alkohòl nobo aki a kuminsá na mart 2020 i Glacial ta trahando duru pa sigurá ku e produkto aki ta presente den tur e botika i supermerkadonan grandi na Kòrsou. Banda di esaki, nos loshon desinfektante mas resien a yega merkado na aprel di 2020 i su porsentahe di 68% di alkohòl ta un gran kompañero pa desinfektá man.

MEDIDANAN PREVENTIVO KONTRA DI CORONA: PROTEHÁ BO MES

Laba bo mannan regularmente durante 20 sekònde. Si na dado momento bo no por laba bo mannan, usa un desinfektante òf un loshon pa man ku un porsentahe di alkohòl di 60% òf mas. Bo por konta ku e desinfektante di man di Glacial ku tin un porsentahe di alkohòl di 62%, e loshon desinfektante ku tin un porsentahe di 68%, e alkohòl di hunta ku tin un porsentahe di 70%, òf e Alcolado Glacial ku tin un porsentahe di 76%. Mantené distansia sosial, no duna man i evitá di mishi ku bo kara mas tantu posibel.

Ora bo informá bo mes i sigui e medidanan preventivo aki, bo ta protehando nò solamente bo mes sino tur hende ku ta rondoná bo. Sigui informá bo mes dor di lesa i skucha e kanalnan informativo ofisial.