Historia di Alcolado Glacial

adminArticlesLeave a Comment

Alcolado Glacial ta un di e produktonan di Kòrsou ku ta praktikamente konosí dor di henter poblashon. E ta un produkto hopi kerí i ku a sigui wòrdu uzá di generashon pa generashon. Ounke e maneranan ku ta uza e produkto a kambia dor di añanan, e ta sigui ta un produkto ku simpelmente no por falta na kas. Bo ta di akuerdo?

Pero, kiko ta e historia di Alcolado Glacial? Kon bin a krea e produkto aki? Anto kiko a sòru pa e produkto aki bira un di e produktonan mas importante i eksitoso di Kòrsou? Lesa e artikel aki i laga nos bai bèk den tempu pa selebrá huntu e historia di Alcolado Glacial.

Nasementu di Alcolado Glacial

Den dekada di añanan ‘40, un apotheker na Kòrsou tabata buska un alternativa pa un ‘after-shave lotion’. E apotheker aki, di ken nos no tin masha detaye, a eksperimentá ku varios produkto i diferente ingrediente, te na momento ku el a yega na e resèpt di Alcolado Glacial. E apotheker a ripará ku e no a yega na e after-shave lotion ku inisialmente e ker a yega na dje, pero ku e produkto ku el a krea, si tabata tin kualidatnan hopi refreskante. Despues di esaki, el a aserká Curaçao Laboratories anto bende nan e resèpt.

E nòmber Alcolado Glacial a wòrdu skohé dor ku Alcolado ta nifiká friu anto Glacial ta un masa di eis. Pues ku e nòmber Alcolado Glacial ke representa un friu fuerte… anto kua mihó kompañero pa esaki ku un pinguin? E detaye interesante tokante esaki ta ku, ni maske e pinguin ta hopi konosí anto ta un di e pilarnan di e marka Alcolado Glacial, en realidat nunka no a skohé un nòmber p’e. Si Curaçao Laboratories lo puntra bo pa duna e pinguin un nòmber, kua nòmber abo lo skohe?

Alcolado Glacial den komunidat kurasoleño

Ta for di 1948 spesifikamente, Curaçao Laboratories a kuminsá produsí i bende Alcolado Glacial den kantidatnan grandi. Na momento ku a kuminsá e produkshon, no tabata tin un idea di e importansia ku e produkto aki lo bai tin den pueblo kurasoleño. Loke si tabata bistu ta ku e produkto aki tabata destiná pa aliviá i kombatí e kalor ku nos sa eksperensiá riba nos isla. Poko poko e produkto a wòrdu adoptá pa grandi i chiki i el a bira un produkto ku simpelmente no por a falta na kas. Dor ku mayoria di poblashon no tabata tin èrko na kas, a bira un kustumber pa basha un tiki Alcolado Glacial den awa ora di baña i asina sinti fresku pa mas largu. Ta asina ku e Alcolado Glacial a bira konosí komo e ‘èrko den bòter’.

Además di refreská, usuarionan regular di Alcolado Glacial a kuminsá uzele pa dolor di kabes, nanishi será, tosamento, dolor di muskulo, aliviá pikadura di sangura, entre otro. Ta asina Alcolado Glacial a kuminsa bira parti di nos bida diario. Otro suseso ku a kontribuí na e kresementu di Alcolado Glacial tabata e tremendo propagandanan i promoshonnan ku Glacial a bin ta desaroyá dor di añanan. Awendia bo ta mira Glacial ta refreská hende riba kaya, den promoshon na diferente supermarket, hasiendo rifa tremendo riba social media, i hopi mas. Pero ken di nos (mayornan) ta korda temporada ku Meneer Angel Job tabata uza su Alcolado Glacial den su programa “Show di Job” na kanal 8? E programa aki sigur tabata un impulsor di Alcolado Glacial i ta forma parti di e kresementu di e marka.

Alcolado Glacial den ekstranhero

Ta ku hopi orguyo por bisa ku despues di hopi aña di esfuerso i apoyo di nos poblashon lokal, Alcolado Glacial ta konta ku rekonosementu mundial ya ku e ta wòrdu eksportá na mas ku 25 pais rònt mundo.

Plannan pa den futuro

E plannan di Alcolado Glacial ta pa sigui refreská i laga bo sinti mihó den momentunan malu. E intenshon pa ku futuro ta pa sigui desaroyá produktonan di kalidat haltu, ku por kompaña bo den bo bida diario, i ta p’esei tin e Hand Sanitizer anto e Rub di Glacial. Otro produkto ku Glacial tin pensá di trese riba merkado lo ta produktonan similar, di kuido personal i mas ku klaro, refreskante. Kua otro produkto abo lo ke Glacial bin kun’é?

Leave a Reply

Your email address will not be published. Required fields are marked *