E importansia di Glacial for di 1948

adminArticlesLeave a Comment

Un produkto di nos

Ku 71 aña riba merkado, Glacial ta un di e markanan di mas kerí i uzá na Kòrsou. Además di Alcolado Glacial, e famia di produktonan a krese dor di añanan ku habon, rub, hand sanitizer i awor nos produktonan nobo, ‘70% Ethyl Alcohol First Aid Antiseptic’ i nos ‘Sanitizing Lotion‘.

Pero, kon e marka aki a originá, i ken ta e personahenan tras di e eksito Glacial? Laga nos profundisá huntu riba historia di Glacial i e delaster akontesementunan.

Historia di Glacial i Glacial Cares

Alcolado Glacial ta un produkto ku ta eksistí for di aña 1948. E aña aki e kompania Curaçao Laboratories a lanta e fabrika di Glacial na Landhuis Chobolobo, e lokashon historiko ku te awendia ta e kas di nos marka lokal. Glacial a ekstendé su vishon “Trahá pa bo sinti mihó” den komunidat, i bou di e kampaña di Glacial Cares, nos marka lokal tin komo meta pa tin un efekto positivo den salú i biniestar di henter komunidat.

Produkshon di Glacial

E produkshon di e produktonan di Glacial ta wòrdu hasí 100% na Kòrsou. Den kuminsamentu e produkshon aki tabata konsistí di prosesonan manual, pero awendia nos ta konta ku un proseso semi-outomatiko. E forsa di trabou di nos fabrika ta konsistí di un tim sumamente komprometé i ku hopi aña di eksperiensia na Glacial.

Delaster akontesementunan rondo Coronavirus

Debí na e suseso di Coronavirus, por bisa ku nos trahadónan ta hasiendo nan máksimo esfuerso i e meta ta pa nos por kontinuá di supli e demanda ku tin pa nos produktonan aktualmente. Na e manera aki nos lo sigui promové un higiena saludabel, i lo sigui enkurashá pueblo pa apliká e medidanan preventivo publiká dor di instanshanan ofisial.

Nos produktonan nobo: 70% Ethyl Alcohol First Aid Antiseptic i Sanitizing Lotion

Den nos kompromiso ku biniestar i higiena saludabel, nos a desaroyá un ‘70% Ethyl Alcohol First Aid Antiseptic’ òf tambe konosí komo ‘Rubbing Alcohol’. E produkshon di e produkto aki a kuminsá luna di mart i Glacial ta trahando hopi duru pa e alkòhòl por t’ei presente den tur botika i supermerkado grandi na Kòrsou. Nos Sanitizing Lotion a yega merkado Aprel 2020 i esaki tambe ta un produkto di Glacial ku bo por konta kun’e pa ta bo kompañero i protehá bo.

Medidanan preventivo kontra di Coronavirus: protehá bo mes

Kòrda di laba man frekuentemente durante 20 sekònde. Si bo no por laba man, bo por hasi uzo di Hand Sanitizer òf loshon ku un porsentahe di alkòhòl di 60% òf mas. Den e kaso aki bo por konta ku nos hand sanitizer di Glacial ku un un porsentahe di alkòhòl di 62%, nos Sanitizing Lotion di 65%, nos alkòhòl etiliko ku 70% i Alcolado Glacial ku 76%. Distanshá bo mes mas tantu posibel for di kamindanan públiko, no duna otro man, anto purba di no mishi ku bo kara.

Dor di informá bo mes i apliká e medidanan preventivo aki, bo tambe lo duna bo sosten pa huntu nos por protehá nos mes, nos sernan kerí i henter komunidat. Sigui informá bo mes i kòrda chèk tur informashon via kanalnan di informashon ofisial.

Leave a Reply

Your email address will not be published. Required fields are marked *