Awa ku habon òf ‘Hand-Sanitizer’: ki ora bo mester usa kua?

adminArticles1 Comment

Hand Sanitizer di Glacial

Tin hende ku ta kana dia aden i dia afó ku un hand sanitizer den nan tas i tin otro hendenan ku no a ni yega di tende di e palabra ‘hand sanitizer’ . Tambe tin hende solamente ta laba man ku awa i habon, tanten otro ta laba ku awa i habon pero tambe ku hand sanitizer. Mane bo ta mira kada hende tin nan manera, loke ta trese konfushon den e uso di e dos produktonan aki. Pa aklará e konfushon nos tei splika kiko ta un hand sanitizer, pa esnan ku no sa, i na ki or abo ta usa hand sanitizer òf awa ku habon.

Kiko ta hand sanitizer?

Hand sanitizer ta un produkto antiséptiko pa man ku ta wòrdu usa pa komplementá labamentu di man ku awa ku habon. Bo por haña hand sanitizer den diferente manera manera gèl, líkido, foam, klinèks, ku alkohòl òf sin alkohòl, ku holó di rosa òf holó di lavendel—di tur manera.  Hand sanitizer ta un bon manera pa mata bakteria i pa prevení transmishon di enfermedatnan di infekshon.

E diferensia entre hand sanitizer i awa ku habon

Pa komprendé kon mester usa kada un di e produktonan aki ta importante pa sa promé kiko ta e diferensia entre limpia man ku hand sanitizer òf limpia man ku awa ku habon. Ora bo laba bo man ku awa ku habon bo ta kitando sushi for di bo man i alabes mata bakteria. Hand sanitizer tambe ta mata bakteria, pero pa hasi esaki e mester tin un mínimo di 60% alkohòl. E efektividat di e dos manera nan aki ta sintá den e manera ku un persona ta uz’é. Mayoria persona ta laba nan man muchu lihé lokual ta buta ku nan no ta mata mes un tantu bakteria manera ora bo usa un hand sanitizer.

Ki ora usa awa i habon i ki ora usa hand sanitizer?

Laba man ku awa ku habon ta e manera mas mihó pa kita sushi for di bo man. Awa ku habon no solamente ta limpia man pero tambe e ta kita bakteria. Laba man ta nifiká si ku bo tin ku laba bo man pa un mínimo di 20 sekònde. Ménos ku esei no lo hasi masha efekto. Pero kiko ta pasa ora bo no tin awa ku habon?

Na momento ku bo no tin awa ku habon e opshon mas mihó ta pa usa hand sanitizer. Un hand sanitizer a base di un mínimo di 60% di alkohòl lo duna e mihó resultado. Basha un kantidat generoso riba bo mas i frega esaki. Na e manera aki bo por logra mata bakteria sin mester di usa awa ku habon. Hand sanitizer ta un bon opshon pa limpia man den transkurso di dia.

Hopi hende ta limpia man solamente despues di sali for di baño, promé ku bai kome òf despues di kome. Ku un hand sanitizer bo por limpia bo man mas frekuente na e momento nan ku bo no tin alkanse na awa ku habon. Por ehèmpel ora bo ta na trabou tras di un kòmpiuter, den un outo, na un baño públiko sin habon, òf despues di mishi ku algu fis.

Kemen, sòru pa semper bo tin bo hand sanitizer kubo pa limpia bo man frekuentemente i pa bo por usa ora bo no tin awa ku habon pa laba man.

One Comment on “Awa ku habon òf ‘Hand-Sanitizer’: ki ora bo mester usa kua?”

Leave a Reply

Your email address will not be published. Required fields are marked *