5 produkto popular den Karibe ku ta hasi maravia

adminArticlesLeave a Comment

5 Produkto Popular den Karibe

Den e artíkulo aki, nos a kompilá e top 5 produkto mas popular den Karibe ku ta hasi maravia. Nos ta stima e produktonan aki dor ku nos por uzá nan na diferente okashon i pa diferente motibu. Laga nos wak ta kua nan ta.

Alcolado Glacial

Si bo ta lesando, ta pasobra bo tambe stima Alcolado Glacial, un produkto di nos. Alcolado Glacial ta yuda pa hopi kos i e ta bo kompañero den bo kuido personal. Atrabes di aña, Alcolado Glacial a bira internashonalmente konosí, i awor aki tambe e ta wòrdu gustá dor di personanan bibando den eksterior manera Sürnam i Barbados.

Loke ta hasi Alcolado Glacial asina versátil, ta e kombinashon di ingredientenan i e kalidat haltu di e produkto. E kombinashon di alkohòl i mèntòl ta sòru pa un sensashon refreskante i e ta wòrdu uzá tambe pa despues di feita, pa aliviá dolo’i kabes, dolo’i múskulo, i hopi mas. Danki na e versatilidat aki, Alcolado Glacial ta un produkto ku ta wòrdu uzá pa mas ku 70 aña dor di grandi i chiki.

Curaloe

Aloe vera ta konosí komo un planta hopi saludabel ku ta krese abundantemente na Kòrsou. Danki na e kresementu abundante aki, a nase otro produkto di Kòrsou ku un kalidat haltu i alkanse internashonal; Curaloe. E produkto aki por wòrdu uzá pa kuido di kara, kurpa, i rekuperashon di herida.

Door di e proseso 100% natural ku Curaloe ta bai den dje, e ta mantené tur e vitaminanan i mineralnan di aloe vera ku ta nesesario pa remediá kualke tipo di kueru. Ta p’esei Curaloe ta konsiderá komo un produkto maravia pa trata hasta e heridanan di mas fèrfelu, òf simpelmente pa mantené un kueru saludabel.

Bay Rum

Na Sint Thomas nan a krea un produkto ku ta un destilashon di rum i blachi ku fruta di un mata nativo di e área ei ku yama ‘Pimenta Racemosa’. Tambe nan ta hinka un tiki zeta den dje. Mayoria bes esaki ta zeta di klabu.

Bay Rum ta un loshon ku ta wòrdu uzá pa despues di feita, dolo’í kabes òf komo kolonia. Tambe nan sa uz’é komo deodorante. Además, aki den nos regio hende sa uzé’le pa baña baby tambe. Nan ta basha un lèk den e awa anto baña e baby poko poko, pa refreská e baby anto sòru ku e por drumi mas mihó. Otro benefisio ta ku e ta laga e baby keda hole dushi.

Humprey’s Agua Maravilla

Humpreys Agua Maravilla no ta un produkto ku a nase for di den Karibe, pero ta un produkto ku si ta sumamente konosí den e region aki. Aki na Kòrsou mes Agua Maravilla ta hopi popular. E produkto aki tin su origen na Merka i ta eksistí for di 1854. Humphrey’s Agua Maravilla ta wòrdu uzá komo kolonia òf pa trata kueru sensitivo.

Agua Florida

Meskos ku Humpreys Aqua Maravilla, Agua Florida tambe ta wòrdu produsí na Merka pero ta hopi uzá den Karibe i Latino Amérika. Agua Florida ta un kolonia ku ta konsistí di apelsina zut i algun aroma mas. Pa e motibu aki, hopi hende ta uz’é komo kolonia, pero tambe pa baña òf pa limpia kas kun’é.

Bo tabata konose algun di e produktonan aki kaba? Nos ta rekomendabo uza nan pa aliviá kualke mòlester ku tin di haber ku bo kueru òf bo múskulonan. Nan ta hopi saludabel i spesialmente útil ora ta hasi hopi kalor.

 

 

Leave a Reply

Your email address will not be published. Required fields are marked *